Kereban Nitihka Tema dalam Dokumen Standard

Kereban nitihka tema dalam Dokumen Standard

Teori Segitiga Semiotik

Teori Segitiga Semiotik

Nitihka C.K. Ogden enggau L.A. Richards (1923) dalam bup The Meaning of Meaning, reti Teori Segitiga Semiotik ulih dipeda ba tiga komponen iya nya simbol, pikir enggau referens. Ketiga-tiga pekara nya bekaul rat enggau pangan diri. Reti tiga komponen nya iya nya simbol ti mai reti leka jaku, pikir ti mai reti konsep lalu referens ti mai reti pekara tauka penemu. Nitihka Raminah Hj. Sabran enggau Rahim Syam, 1987, simbol iya nya konstituen linguistik baka leka jaku tauka ayat, referens iya nya pekara sereta pikir iya nya konsep.

Kar ba atas nya iya nya kar Segitiga Semiotik. Dalam setiga semiotik, garis entara simbol enggau referens nya putus-putus laban tu nandaka kaul entara simbol enggau referens nya enda besekat. Chunto ulih dipeda ba baruh tu:-

Bepelasarka chunto ba atas, manuk nyadika simbol dalam segitiga semiotik. Referens ngagai manuk iya nya ngembuan dua iti kaki, bebulu, mayuh macham chura sereta nemu bejalai. Lebuh leka jaku manuk disebut, kitai lalu ulih berundingka tukuh manuk ti ke bendar sereta baka ni pendiau tauka penteba ti bisi ba manuk. Udah nya, kitai lalu ulih nerangka referens senentang manuk baka chunto ba atas. Enti nyema kitai enda kala meda manuk, kitai enda ulih madahka penteba ti bisi ba manuk lalu kitai mega enda ulih meri referens ngagai manuk. Nya alai, konsep enggau pikir tu endang bekaul rat enggau pangan diri laban konsep ti diberi ngagai pikir ulih ngenataika pekara nengah referens. Dalam aspek tu, referens tu mega ulih dikumbai penteba ngagai sesebengkah simbol. Nitihka penemu Ogden enggau Richard mega, simbol (leka jaku) meri konsep ba pikir lalu pikir deka ngenataika pekara tauka konsep nya nengah referens.

Tanya/kereja latih

Tanya Semantik
1. Terangka bida Reti Konotatif enggau Reti Denotatif sereta nama guna iya dalam Jaku Iban.
2. Bepelasarka teori koherensi, beri tiga chunto ayat ti ulih nerangka reti koheren enggau nyata.
3. Terangka sepil transliterasyen enggau sepil transkripsyen lalu beri chunto ke seriran.
4. Padahka guna pemansang terminologi dalam jaku Iban.


Tanya Sintaksis
1. Peratika ayat ba baruh tu lalu padah sekalika ayat nya ayat tunggal tauka ayat turu. Padahka nama kebuah dikena nyukung penemu nuan.

" Sebuah lori bechura gadung ngundan buah sawit udah ngelantak pun kayu ba mua rumah panjai kami kemari".

2. Nama bida jaku pengawa transitif enggau jaku pengawa enda transitif lalu beri chunto ke seriran.
3. Terangka bansa ayat ti bisi dalam jaku Iban lalu beri chunto ayat ti seriran.
4. Padahka reti ayat tanya tebuka lalu beri chunto ke seriran.


Tanya Morfologi
1. Rintaika proses penambah ti bisi dalam jaku Iban lalu tiap iti proses nya bisi chunto ke seriran.
2. Padahka bida jaku tumbuh enggau jaku turu lalu beri chunto ayat.
3. Proses betanduka jaku turu nya bisi ngembuan mayuh macham. Terangka proses tauka chara betanduka jaku turu lalu beri chunto ke seriran.
4. Terangka Jaku Ganti Nama diri orang ti bisi dalam jaku Iban lalu padahka maya iya dikena.


Tanya Fonetik enggau Fonologi
1. Terangka baka ni vokal belakang setengah ngerupit diasilka. Udahnya, beri chunto ke seriran.

2.
                                              
                                         Tukuh mulut setengah munchung maya ngasilka munyi

Bepelasarka gambar ba atas nya, padahka urup vokal ti engkeman enggau gambar nya.

3. Terangka reti fonologi enggau fonetik ti suah dikena dalam jaku Iban.
4. Padahka perengka tubuh ti dikena lebuh ngasilka munyi konsonan.

Semantik

Bansa reti enggau asal reti dalam sempama

Reti Denotatif

-Reti leksikal tauka leka jaku ke bendar

-žReti ke ulih digiga tauka bisi ba diksionari

-žChunto: gatal jari (jari gatal laban kena ketup semut, balut getah enggau ti bukai)

Reti Konotatif

žUkai reti leksikal tauka leka jaku ke bendar

žEnda sebaka enggau reti ba diksionari

žBepelasarka konteks enggau tuju komunikasyen

žChunto: panjai jari (selalu enchuri tauka nabanka barang orang)

Sintaksis

Frasa pengawa enggau siti objek

Chunto ayat:-

1.Kami ngirup ai nyiur.

2.Aku enggai makai ubat.

3.Apai iya melah kayu

•Jaku pengawa ti mai reti adjektif tau dientudika enggau jaku penguat lalu objek iya tau mega dipilih.

•Reti nya iya tau ditinggalka enti objek nya datai ari leka jaku ganti nama diri kesatu enggau ketiga (orang/bala mayuh).

Chunto ayat:

1.Pemutus jaku iya chukup ngenyinuka ati (aku/orang)

2.Peresa bulan nyin tadi balat ngenusahka ati. (kami/orang)

3.Sada nyawa indu ke belagu nya endang narit ati. (aku/orang)

Morfologi

Definisyen morfologi

Morfologi sesebengkah bansa jaku nya jalai nempa leka jaku.Bisi sekeda bansa jaku di dunya tu sebaka jalai nempa leka jaku lalu bisi mega bebida.Bisi sekeda jaku ngena chara meri penambah ngagai urat jaku lalu bisi mega ngena chara ngubah tukuh dalam leka jaku nya empu baka jaku Arab.Nyadi morfologi jaku Iban nya bidang penemu ti betungkapka struktur, tukuh enggau raban jaku.Iya endang siti bidang ti kompleks lalu tau dipeda nyadika jematan ti besabungka kaul sintaksis enggau fonologi jaku. Morfologi dikumbai bekaul enggau pansik pasal gaya leka jaku ti datai ari munyi sebut. Iya bekaul enggau pansik sintaksis laban ari leka jaku ti tau didijir nyadi frasa, klausa enggau ayat ti mai reti. Nya alai dalam bab tu kitai deka beratika pansik jalai jaku berengkah ari konstituen ti pengabis mit dalam atur jalai jaku ti tau dikena nempa leka jaku sereta bisi mai reti ti meruan sereta menyana.

Baka ti udah disebut pansik struktur jaku mungkur munyi sebut tauka lambang tulis ti nyadi unit jaku ti bisi ngundan reti. Tukuh jaku nya gaya unit jalai jaku, sekalika iya betukuh tunggal tauka datai ari proses meri penambah, beturuka leka jaku tauka proses jaku betandu. Beripihka jaku ngagai raban jaku nya proses nijirka leka jaku ngagai raban ti bisi leman penyemaka lalu tau dibagi nitihka fungsyen dalam raban leka jaku ti sama. Unit jalai jaku ti nyadi leman leka jaku disebut morfem.Morfem nya unit ti pengabis mit dalam jaku ti befungsi gramatis dalam jalai jaku. Leka jaku nya tukuh jaku ti mit tang ngundan reti ti menyana lalu ulih bediri kediri.

Sesebengkah leka jaku nya nyadi ari siti morfem tauka lebih.Ngambika chunto leka jaku ajar, datai ari siti morfem, tang leka jaku ngajardatai ari dua morfem iya nya ng- enggau ajar. Bisi mega leka jaku ti ngundan tiga morfem, ngambika chunto be + jalai + ka; lalu bisi mega ngundan empat morfem, ngambika chunto be + se + me + kih. Nyau deka semua bansa jaku di dunya tu endang ngena chara ti baka tu dikena nempa leka jaku. Proses nempa leka jaku baka tu mega bisi nyadi ba jaku bansa bukai di dunya. Ambika chunto leka jaku unlikely “enda patut” ( jaku English), datai ari tiga morfem, iya nya: un-, like, enggau –ly sereta dalawa “dua” (jaku Tagalog) ngundan tiga morfem, iya nya da, la, enggau wa.

Morfem tau betukuh meras enggau berikat. Morfem meras nya morfem ti ulih bediri Kediri tang morfem berikat semina ulih bediri enti disukung enggau morfem bukai. Ambika chunto, leka jaku, rumah enggau jalai nya morfem meras tang penambah be- dalam leka jaku berumah enggau bejalai nya morfem berikat laban unit tu enda ulih bediri kediri enti enda besukung enggau urat jaku.

Tukuh leka jaku

Tukuh leka jaku tau datai ari siti morfem tauka dijir morfem. Proses nempa leka jaku tau ngasilka tukuh jaku ti baka tu:

(i)            Tukuh jaku tunggal

(ii)           Tukuh jaku tumbuh

(iii)          Tukuh jaku turu

(iv)         Tukuh jaku betandu

(v)          Tukuh jaku bekaling sebut

(vi)         Tukuh jaku puntang

Tukuh jaku tunggal

Jaku tunggal enti diperatika ari patah sebut tau ngundan siti patah sebut tauka lebih ari siti pata sebut. Pia mega  siti patah sebut tau dipenyadi lebih ari siti vokal (V) aja, tauka siti vokal disempulang enggau siti konsonan (K) tauka beberapa iti konsonan. Konsonan nya tau datai ari mua vokal tauka ari belakang, tauka ari mua vokal tauka dibelakang iya seretai.Dalam jaku Iban leka jaku ti pengabis pandak semina bisi nyadi berindik ari siti vokal enggau siti konsonan enggau dua iti vokal ti datai seretai. Chunto jaku tunggal ti ngembuan siti patah sebut ke bebida-bida chara nusun urup V enggau K tau dipeda dibaruh tu:

i)             VV

au              (saut kena madahka setuju)

ai               (ai ujan, ai sungai etb.)

ii)            KV

yu              (sebansa ikan tasik)

tu               (madahka endur ke semak orang ti bejaku)

ju               (sakal tauka tulak)

ru               (sebansa kayu)

ti                (jaku relatif)

i)             VK

it                (ngansak ukui nyalak ari endur ti jauh)

as              (ngansak ukui nyalak ari endur ti semak)

ii)            KVK

suh                        (beri/ngagai)

roh             (semengat)

bah            (ai besai udah ujan/bebai)

bab            (lumpar tauka bagi dalam bup)

sen                        (mata duit)

iii)           KKVK

stor            (bilik alai nyimpan barang)

skel            (tangga/tingkat/sukat)

draf            (langgur)

iv)           KVKK

teks           (bup/nota)

Chunto jaku tunggal dua patah sebut ti bisi mai K enggau V dalam mayuh macham tusun. Sekeda chunto tau dipeda di baruh tu:

i)             VKV

a – ku        aku (ganti nama diri)

a – lu         alu (kereban dikena nutuk)

ii)            KVV

s – ua        sua (beri/enjuk)

d – ua        dua (penyampau)

t – ua         tua (nuan enggau aku)

i)              KVKV

sa – ma     sama (bela/sebaka)

ra – ta        rata ( sama paras/entap)

Chunto jaku tunggal tiga patah sebut ti bici mai K enggau V dalam mayuh macham tusun. Sekeda chunto  tau dipeda dibaruh tu.

i)             KVKVKV

le + la + ki             lelaki (penempa)

be + bi + ni            bebini (ngambika bini)

ii)            KVKVKVK

ke + ke + sap        kekesap (kijap mata)

ke + ke + but         kekebut ( beinggut-inggut)

Jaku tunggal akronim nya tukuh ti ditempa ari ti besakumka munyi keterubah ari leka jaku tauka rakup ari beberapa unit tauka bagi dalam leka jaku kena nempa siti leka jaku baru ti mampat. Chunto:

            Jaku Iban

                        cher – pan       cherpan (cherita pandak)

                        pa – la – nem  palanem (palan latih nembiak)

                        PPJI                Panel PenulisJaku Iban

                        IMI                   Industri MuzikIban

                        SIDS               Serakup Indu Dayak Sarawak

            Jaku Melayu

                        ha – kis            habis kikis

                        ta – di – ka      taman didikan kanak-kanak

                        jen – to – lak    jentera tolak

                        ABIM               Angkatan Belia Islam Malaysia

                        Petronas          Petroleum Nasional

            Jaku English

                        MARDI             Malaysian Agricultural Research Development Institute

                        NATO              North Atlantic Treaty Organization

                        FELDA             Federal Land Development Authority

Tukuh Jaku Tumbuh

Jaku tumbuh nyadi ari proses meri penambah, iya nya proses meri penambah ngagai urat jaku ti ngujungka tumbuh leka jaku baru ti entap sereta menyana.Tebal agi leka jaku ti nerima penambah nya morfem meras lalu penambah nya morfem berikat. Chunto jaku tumbuh ti datai ari urat jaku tauka morfem meras nya baka tu; be + jalai, eng + kasak enggau ti bukai. Proses meri penambah tau mega nyadi ba jaku tumbuh enggau jaku turu. Chunto leka jaku ti ngundan urat jaku ti datai ari jaku tumbuh enggau jaku turu nya baka tu:

a)    penambah enggau urat jaku tumbuh

di + kerindu + ka         dikerinduka

di + kesayau + ka       dikesayauka

b)    penambah enggau urat jaku turu

be + darah gatal                      bedarah gatal

be + pandam isi mengkal       bepandam isi mengkal

Penambah datai ari morfem berikat lalu urat jaku nya morfem meras ti ulih nerima penambah.Morfem berikat ti disebut urat mimit bendar.Penambah nya mega tukuh morfem ti enda ulih bediri Kediri dalam ayat, reti nya iya mesti disakumka enggau urat jaku. Berindik ari endru iya ba urat jaku, penambah tau dibagi ngagai empat bengkah iya nya:

i)              penambah mua (datai ari mua urat jaku)

ii)             penambah belakang (datai ari belakang urat jaku)

iii)            penambah kepit (datai seretai lalu ngepit urat jaku)

iv)           penambah selit (datai nyelit antara urat jaku)

a)    Jaku tumbuh bepenambah mua

Penambah mua tau datai dalam jaku nama tumbuh, jaku pengawa tumbuh enggau jaku adjektif tumbuh, baka tu:

i)              penambah mua jaku nama

ii)             penambah mua jaku pengawa

iii)            penambah mua jaku adjektif

Chunto:

i)              penambah mua jaku nama

pe-                   -           (penyampau, pejaku, penanyi)

pem-                -           (pemberita)

penge-             -           (pengeluan, pengerangka, pengetin)

pel                   -           (pelakun)

peng-               -           (pengirup, pengindu)

se-                   -           (seraban, sebala)

per-                  -           (perengka, peranak)

juru-                 -           (jurubahasa, juruselam)

pra-                  -           (prasekula, prauniversiti, prasangka)

sub-                 -           (subkelas, subsistem, substandard)

eka-                 -           (ekajaku, ekachura, ekadimensyen)

dwi-                 -           (dwijaku, dwifungsi, dwibunyi)

supra-              -           (supranasional, suprakelas, suprasegmental)

ii)             penambah mua jaku pengawa

me-                  -           (merarau, meragau, melalau)

ng-                   -           (ngambuh, ngirup, ngari)

ny-                   -           (nyukat, nyakal, nyilup)

nge-                 -           (ngeredai, ngelamun, ngelicha)

be-                   -           (belaki, bebantai, belanda)

di-                    -           (diayah, ditanchang, ditendang)

dipe-                -           (dipelepa, diperambu, dipejaku)

en-                   -           (entachang, enticing)

em-                  -           (empekak, empegal empakap)

eng-                 -           (engkasi, engkasak, engkual)

te-                    -           (telantak, tesebut, tetegu)

iii)            penambah mua jaku adjektif

nge-                 -           (ngemandak, ngemajik, ngenebal)

ke-                   -           (kekijap, kekasak, kekesap)

me-                  -           (memanah, memanis)

be-                   -           (bebagas,bebajik, beburak)

pe-                   -           (pepanjai, pepelu, pepaga)

nge-                 -           (ngelaju, ngelubah, ngemurak)

te-                    -           (tetegap, tetinggi)

b)    Jaku tumbuh bepenambah belakang

Jaku tumbuh bepenambah belakang dalam jaku Iban semina bisi ba jaku pengawa tumbuh aja baka ba chunto di baruh tu:

            ngetan             -           (ngetanka)

            ngara               -           (ngaraka)

            ngalih               -           (ngalihka)

            mandang         -           (mandangka)

            mekuh             -           (mekuhka)

            mending          -           (mendingka)

c)    Jaku tumbuh bekepit

Penambah bekepit ba jaku tumbuh dalam jaku Iban datai dalam jaku pengawa. Peratika chunto ba baruh tu:

            me…ka           -           (melintangka, melakangka)

            ng…ka                        -           (ngeninggika, ngenembuka)

            ny…ka                        -           (nyerengutka, nyemakaka)

                        pe…ka                        -           (perekuhka, pejeraka)

                        te…ka             -           (tebuaika, tebaika)

                        be…ka                        -           (bejuka, bejaika)

                        di…ka              -           (dikesayauka, dipejuraika)

                        dike…ka          -           (dikerinduka, dikelarika)

                        tepe…ka         -           (tepedayaka, teperindangka)

d)    Jaku tumbuh selit

Jaku tumbuh ti betukuh selit tu enda mayuh ditemu dalam jaku Iban.Tukuh jaku ti baka tu enda tentu produktif, lalu semina dikena ba lebas ti ditentuka aja. Jaku tumbuh selit semina bisi ba jaku nama enggau jaku adjektif aja. Chunto:

i)              penambah selit jaku nama

-le-       -           kelemayang, kelebembang, kelekatai

            ii)         penambah selit jaku adjektif

-er-      -           serabut, berigi

-be-      -           teberingkas, teberunsai

Tukuh Jaku Turu

Jaku turu nya tukuh ti diasilka ari proses ti nijirka dua iti urat jaku tauka lebih ti unit enda tau diubah tusun, laban enti diubah tusun dia reti iya enda entap sereta enda bisi mai reti ti entap sereta menyana. Jaku turu dipeda nyadi siti unit tang disepil beserara.Jaku turu besibil ari frasa laban iya enda tau diselitka leman bukai antara tiap-tiap unit ti bisi.Pia mega semua menyana.

            Chunto jaku turu jaku nama:

                        balai pulis                    paku lawang                dua puluh tiga             

                        bup cherita                  tinchin semaya            beg sandik

                        daya idup                    batu pengansah          ai sungai

            Chunto jaku turu sempama:

                        manis mulut                ragak riang                  kaki butul

                        panjai jari                     tinggi tungku                tunggang lupung

                        tebal pending               kaki bangku                ati batu

Dalam jaku Iban tukuh jaku turu ti bansa tu mayuh bendar nyementang ari jaku ti dikena besehari-sehai datai ngagai adat enggau leka main. Jaku turu mega tau dibagi ngagai:

i)              jaku turu ti datai ari rambai jaku meras

Chunto:

            kereban tulis                kar perugan

            jalai alun                      charta pie

            lemai hari                    papan notis

            batu ansah                  bom atom

Dalam kategori tu mega disengkaumka enggau tukuh jaku ti dikena meri tanda pangkat, gelar tauka ensumbar:

Chunto:

                        Kepala Menteri            Bujang Berani

                        Sekretari Menua         Tuai Gawai

                        Kepala Pengajar         Sapit Menteri

ii)             jaku turu ti betukuhterminologi

Chunto:

                  mija besegi                  darah gatal

                  tinga pelanduk             reta pesaka

                  atur chara                    leka jaku

iii)            jaku turu ti mai reti sempama bisi tiga bengkah

a)    jaku turu kelaung

b)    jaku turu silup

c)    jaku turu sema banding

a)    jaku turu kelaung

puang kerubung          buah lemba

buah tamang raja        anak ular

b)    jaku turu silup

bisi ati                          basah jari

tebal pending               nyual mata

c)    jaku turu sema banding

baka kali ke ngumbai periuk aruk

baka langkau enda ngipakka dampa

baka tapang diwan rembia

d)    jaku turu banding

baka nya                     baka nyin

baka tu                        baka ni

Tukuh ti udah entap

Bisi sekeda jaku turu disepil begulai taja pan iya datai ari dua unit laban endang udah entap dikena lalu nyadi leka jaku ti meruan sereta tegap, taja pan leka jaku nya endang nyata bendar datai ari dua urat jaku.Leka jaku ti baka nya endang tetap disepil nyadi seleka leka jaku. Peratika chunto di baruh tu:

                        antarabansa                biaubalai

                        bumiputera                  tanggungpengawa

Siti pekara ti patut diperatika ba alai tukuh jaku turu, iya nya jaku turu patut bendar ditulis beserara ngambika enda nyadika penyaru ba jalai nyepil. Nya alai, jaku turu kelimpah ari ti endang udah entap tauka iya ti nyadi terminologi patut bendar ditulis beserara.

Betanduka jaku turu

Betanduka jaku turu tau digaga ngena chara betanduka leman keterubah jaku aja. Ngambika chunto:

            kereban-kereban tulis                         Mandal-mandal Chanselor

            Kepala-kepala Menteri                        Sapit-sapit Menteri

Meri penambah ngagai jaku turu

Jaku turu tau nerima penambah kena ngasilka jaku tumbuh. Penambah jaku turu tau nyadi ngena chara baka tu:

i)              lebuh jaku turu nerima penambah mua, lalu sepil leka jaku nya beserara. Ngambika chunto:

segi empat      -           besegi empat

darah gatal      -           bedarah gatal

nyual mata      -           bejual mata

pegai jari          -           bepegai jari

ii)             lebuh jaku turu nerima penambah mua, iya nya leka jaku keterubah ti udah nerima penambah diulang sebut. Pia mega leka jaku ti udah nerima penambah nya diseraraka ngena tanda sekang ari leka jaku ti kedua.

Ngambika chunto:

pagi kemari                 -           sepagi-pagi kemari

lemai kemari               -           selemai-lemai kemari

tengah hari                  -           setengah-tengah hari

pagi tadi                       -           sepagi-pagi kemari

iii)            lebuh leka jaku ti keterubah diulang sebut. Iya diseraraka ngena tanda sekang. Ngambika chunto:

bisi ati                          -           bisi-bisi ati

rangkai jaku                -           rangkai-rangkai jaku

tajam runding              -           tajam-tajam runding

           

iv)           lebuh jaku turu keterubah nerima penambah bekepit. Sepil iya meruan beserara.

Ngambika chunto:

tebal pending               -           ngenebalka pending

pandak cherita            -           ngemandakka cherita

panjai jari                     -           dipanjaika jari

manis mulut                -           ngemaniska mulut     

Dalam jaku Melayu, lebuh jaku turu keterubah nerima penambah bekepit sepil mesti disakumka lalu bebida enggau jaku Iban, sepil iya meruan beserara (Tatabahasa Dewan, 2003)

Tukuh Jaku Betandu

Jaku betandu nya tukuh ti diasilka ari proses ngulang urat jaku. 

i)              Jaku betandu patah sebut dulu

Jaku betandu patah sebut dulu nya tukuh ti betandu ba patah sebut dulu kelebih agi ba tuku jaku edjektif. Chunto:

bebesai            chechamang               jejelar

dedugau          gegilik                          kekidu

pepelu             reragang                      gegetar

ii)             Jaku betandu penuh

Jaku betandu penuh nya tukuh leka jaku ti dikena beulang-ulang.Sepil leka jaku ti dikena betandu nya sebaka. Kelas jaku ti dikena betandu nya tau datai ari jaku pengawa, jaku nama rama jaku adjektif tauka jaku tugas. Chunto:

Leka Jaku Tunggal                             Leka Jaku Betandu

kasak                                                  kasak-kasak

malik                                                    malik-malik                

malu                                                    malu-malu

iii)            Jaku betandu urat jaku

Jaku betandu urat jaku nya tukuh leka jaku ti betandu ba urat leka jaku. Bisi dua pola jaku betandu urat leka jaku baka chunto ba baruh tu:

a)    pola jaku betandu urat jaku betukuh jaku pengawa

Leka Jaku Tunggal                             Leka Jaku Betandu

palik                                         -           bepalik-palik

palu                                         -           bepalu-palu

pegai                                       -           bepegai-pegai

b)    pola jaku betandu urat jaku betukuh jaku edjektif

Leka jaku tunggal                                Leka jaku betandu

burak                                       -           burak seburak

mit                                           -           mit-semit

mangah                                   -           mangah-semangah

iv)           Jaku betandu patah sebut dudi

Jaku betandu patah sebut dudi nya tukuh jaku ti betandu bapatah sebut dudi leka jaku lalu tebal agi betukuh jaku adjektif. Ngambika chunto:

Leka jaku tunggal                                Leka jaku betandu

penyinu                                   -           penyinu-nyinu

pemajik                                   -           pemajik-majik

pemayuh                                 -           pemayuh-mayuh

Raban Jaku Nama

Raban jaku nama tau diripih ngagai tiga bengkah nitihka reti jaku. Kar perugan nangkan tu enggau terang nunjukka raban jaku nama.

Jaku Nama

Jaku Ganti Nama

Jaku Nama Rama

Jaku Nama Menyana

 

i)             Jaku Ganti Nama

Jaku ganti nama iya nya jaku ti dikena nganti jaku nama menyana enggau jaku nama rama. Dalam kar perugan ba baruh tu mandangka  pechah raban jaku ganti nama:

Jaku Ganti Nama

Jaku Ganti Nama Tunjuk

Jaku Ganti Nama Diri

Jaku Ganti Nama Diri Tanya

Jaku ganti Nama Diri Orang

Kesatu

Kedua

Ketiga

Beempu

 

Jaku ganti nama tunjuk

Jaku ganti nama tunjuk iya nya jaku nama ti bekenjing nunjuk ngagai sesebengkah pekara tauka sebansa utai. Jaku nama tunjuk semina bisi tiga bengkah, iya nya:

tu         -           ti dikena nunjuka ngagai utai ti datai tegu tauka pekara ti

benung disebut

nya      -           kena nunjuk ngagai utai ti semak tang enda ulih ditegu

tauka pekara ti bisi kaul enggau pekara ti benung disebut

nyin     -           nunjuk ngagai utai ti jauh tauka pekara ti nyata bendar beseraka.

Jaku ganti nama diri

Jaku ganti nama diri iya nya jaku nama ti nyadi penganti sesebengkah utai, pekara tauka mensia. Jaku ganti nama diri tau dibagi ngagai tiga raban:-

a)    jaku ganti nama diri tanya

b)    jaku ganti nama diri orang

a)    Jaku ganti nama diri tanya nya jaku nama ti bekenjing dikena nanyaka utai, pekara tauka ngena jaku tanya. Bisi tiga jaku ganti nama diri tanya iya nya:-

nama               -           nunjuk ngagai nama utai, pekara tauka konsep

sapa                -           nunjuk ngagai bagi orang

ni                     -           nunjuk ngagai bagi orang, nama utai enggau konsep

            Kadang-kadang jaku ganti nama diri tanya tau ngena proses betandu kena ngangkatka reti ti nunjuk ngagai sesebengkah pekara tauka nama utai, orang tauka konse ti enda nemu pengamat.

                        nama               -           nama-nama

                        sapa                -           sapa-sapa

                        ni                     -           ni-ni

                        ila                     -           ila-ila

Jaku ganti nama diri orang

Jaku ganti nama diri orang ngundan leka jaku ti nunjuk ngagai siku-siku orang, iya nya diri orang kesatu, diri orang kedua, diri orang ketiga enggau diri orang beempu, baka ti dibantaika ba baruh tu:

Jaku ganti nama diri orang kesatu	Jaku dikena nganti nama orang ti bejaku. Chunto: aku, kami, kitai
Jaku ganti nama diri orang kedua	Jaku dikena nganti nama orang ti enggau berandau. Chunto: nuan, seduai, kita
Jaku ganti nama diri orang ketiga	Jaku dikena nganti nama orang ti dikeang tauka disebut lebuh dua iku orang berandau. Chunto: iya, sida
Jaku ganti nama diri orang ti beempu	Jaku dikena nganti nama orang ti empu utai. Chunto: engku, engkami, engkita, engkitai, kendua, kenduai, enggiya

ii)            Jaku nama rama

Jaku nama rama nya leka jaku ti nunjuk ngagai nama utai, pekara, tauka konsep ti betukuh rama.

Chunto:

      nama utai        -           dunya, orang, kayu, bintang, langit, matahari, kemayang

      pekara             -           roh, angin, remang, gaya hari

      konsep                        -           pemaik, pengelantang, pemansang, penyerakup bansa

Jaku nama rama tau dibagi ngagai raban ti mit-mit nitihka pemantang reti leka jaku, iya nya idup tauk ukai idup, mensia tauka ukai mensia, institusyen tauka ukai institusyen, konkrit tauka abstrak, ulih ditesa tauka enda ulih ditesa.

Jaku nama rama idup mensia

Jaku nama ti bansa tu nunjuk ngagai mensia, iya nya betukuh idup lalu nanggam reti nama rama. Chunto jaku nama ti bansa tu tau dipeda ba chunto di baruh tu:

            lutur                             aya                              Adriana

            manang                       pengajar                      Nillan

            nembiak                      kaban                          Bujang

Jaku nama rama idup ukai mensia

Jaku nama ti bansa tu datai ari leka jaku ti nunjuk ngagai nama utai idup ukai mensia ti nanggam reti nama rama. Chunto:

            uduk                bungai            

            mayau             batang

            sitan                 sungai

Jaku nama rama ukai idup institusyen

Jaku nama bansa tu datai ari leka jaku ti nunjuk ngagai institusyen ti betukuh ukai idup tang nanggam reti nama rama. Jaku nama institusyen tau dikelala ari gaya penatai leka jaku baka ari enggau ke ari mua jaku nama rama institusyen.

Chunto:

Frasa Jaku Penempat
Jaku Penempat	Jaku nama rama institusyen
ari ke	sekula sepital rumah universiti

Jaku nama rama ukai idup ukai institusyen konkrit

Jaku nama bansa tu nunjuk ngagai nama utai ti ukai institusyen tang betukuh konkrit. Tebal agi jaku nama dalam raban tu nunjuk ngagai tempat. Iya mudah dikelala ari penatai leka jaku ke enggau ari ba mua jaku nama tu. Chunto:

Frasa Jaku Penempat
Jaku penempat	Jaku nama rama ukai idup ukai institusyen konkrit
ke ari	pasar jalai menua sungai mengeri opis

Jaku nama rama ukai idup ukai institusyen abstrak ulih tesa

Jaku nama bansa tu nunjuk ngagai nama utai tauka pekara ti ukai idup, ukai institusyen lalu betukuh abstrak tang ulih ditesa. Iya bekaling enggau jaku tesa.

Chunto:

Frasa Nama
Penyampau	Jaku nama rama ukai idup ukai institusyen abstrak ulih tesa
siti tiap-tiap	peluang pemanah penemu berita pansik program

Jaku nama rama ukai idup ukai institusyen abstrak enda ulih tesa

Jaku nama bansa tu nunjuk ngagai nama utai tauka pekara ti ukai utai idup, ukai institusyen, betukuh abstrak lalu enda ulih ditesa. Chunto:

            peminta                       semengat

            pemeri                         pementas

            penyuah                      peneka

iii)           Jaku Nama Menyana

Jaku nama menyana nya jaku nama ti nanggam reti ti mantang ba nama orang, jelu, nama utai, gerempung (institusyen), undang-undang, bansa, jaku, pangkat enggau mayuh ti bukai. Dalam betulis, urup keterubah jaku nama menyana ditulis enggau urup besai. Jaku nama menyanatau dibagi ngagai dua raban iya nya jaku nama menyana idup enggau jaku nama menyana ukai idup. Jaku nama menyana idup tau mega dibagi ngagai jaku nama menyana idup mensia enggau jaku nama menyana idup ukai mensia.

Jaku nama menyana idup mensia

Jaku nama menyana nya jaku nama  ti nunjuk ngagai mensia.Chunto:

      Nillan                           Tarang Apai Dungkong

      Audrie                          Normah

      Nurul                           Sia Hui Hui

      Kamarugan                 Jaswanth Singh

Jaku nama menyana idup mensia ba atas tau digembar enggau gelar, pangkat, ensumbar enggau buah ayah. Chunto:

Endu Imun                  Orang Kaya Temenggung Jubah

Doktor Sally                Senator Nieyl Ngadan

Indai Dampa               Asisten Suprintenden Polis Tuan Jagan Erry

Prof. Banda Mary       Apai Nayum

Jaku gelar tauka kangau ti dikena ari mua jaku nama menyana idup mensia ti mantang ngagai orang siku-siku baka ti udah ditinggal mati, udah sarak, tauka nyadi sapit mangku pengawa siti-siti. Chunto:

            niang Jawai                 -           (orang ti udah mati nya benama Jawai)

            balu Jawai                   -           (nunjuk ngagai laki niang Jawai ti agi idup)

            rambang Jaba             -           (nunjuk ngagai bini Jaba ti udah sarak ari iya)

            mandal pengulu          -           (orang ti nyadi sapit pengulu)

            mantan tuai rumah      -           (orang ti udah ngetu nyadi tuai rumah)

Jaku nama menyana idup ukai mensia

Jaku nama menyana idup mensia nya jaku nama ti nunjuk ngagai utai idup tng ukai mensia, baka Petara dalam pengarap lama Iban, utai tumbuh enggau ti bukai. Ngambika chunto:

Manang Menjaya(petara)                   Vanda Diana(orkid)

Chapan(ukui)                                      Ananas Comosus(nanas)

Kuning(mayau)                                   Hevea Brasilia(kayu getah)                           

Kijang(jelu siga)                                   Manihot utilissima(ubi kayu)

Tuman(bansa ikan)                             Nymphaea stellata(bungai teratai)

Nama ti ditulis ngena urup chundung nya nama saintifik.

Jaku nama menyana ukai idup

Jaku nama menyana ukai idup nya jaku ti nunjuk ngagai nama utai ti nyengenda tang ukai nama utai idup baka, nama utai, institusyen, menua, tempat, bansa, jaku, pangkat, undang-undang enggau mayuh ti bukai.

Chunto:

Cina                                         Merdeka Plaza

Bup Jaku Iban                         Datin Asmah

Proton Wira                             Sarawak                     

Universiti Malaya                    Sabah

Jaku pengawa

Jaku pengawa iya nya leka jaku ti nyadi teras ngagai pasuk tauka konstruk frasa pengawa. Frasa pengawa datai ari jaku  pengawa ti tau disempulang mayuh leman jaku baka jaku bantu, objek, penembu, ayat komplemen, enggau penerang. Sekeda chunto ayat ti ngundan predikat jaku pengawa nya baka di baruh tu.

1.    Petrus tinduk.

2.    Kami benung bemain selingkut.

3.    Sida sama beduruk nugal ba umai.

Raban jaku pengawa

Jaku pengawa tau dibagi ngagai dua raban ti bebatang baka jaku pengawa ukai transitif enggau jaku pengawa transitif.Jaku pengawa ukai transitif nya jaku pengawa ti nadai begunaka penyambut tauka objek entudika iya.Jaku pengawa ukai transitif tau dibagi ngagai dua subraban iya nya jaku pengawa ukai transitif nadai penembu enggau jaku pengawa ukai transitif bepenembu.

Jaku pengawa ukai transitif nadai penembu

Jaku pengawa ukai transitif nadai penembu nya jaku pengawa ti ulih bediri kediri lalu nadai disukung objek tauka penyambut. Ayat ba baruh tu ayat I ngundan subjek enggau jaku ti ulih bediri kediri, reti nya nadai bepanggai ba leman-leman bukai dikena ngenembuka reti tauka empas ayat. Chunto:

1.    Kami udah pulai.

2.    Aya aku benung ngirup.

3.    Nembiak nya ketawa.

Jaku pengawa ukai transitif tau dientudika leman penerang ti befungsi meri penerang tambah. Chunto:

1.    Kami udah pulai ngagai rumah panjai.

2.    Aya aku benung ngirup ba ruai.

3.    Nembiak nya ketawa meda cherita katun.

Jaku pengawa ukai transitif bepenembu

Jaku pengawaukai transitif bepenembu nya jaku pengawa ti mesti dientudika ngena penembu kena ngayanka reti ayat nya enggau nyemetak.Leman penembu nya enda tau dikelala sibil sekalika objek tauka penyambut.Dua pekara tu endang entiti ti bebida. Objek tauka penyambut semina datai udah jaku pengawa transitif lalu tau mega nerima proses pasif. Penembu nya leman ti entudika jaku pengawa ukai transitif dikena ngayanka reti ayat nya enggau nyemetak.Ayat ti ngundan penembu enda ulih dipasifka. Chunto:

1.    Aku tinduk bepanggalka lengan.

2.    Igat nyadi lutur.

3.    Kami diau ba rumah panjai.

Nitihka chunto ba atas, leka jaku ti ditulis chundung nya jaku pengawa  ukai transitif, lalu leman ti entudika leka jaku ke ditulis chundung nya penembu. Enti penembu ditingkilka, ayat nya nyadi enda meruan sereta begantung tauka nyata salah.Ayat nya mega enda ulih dipasifka.

Jaku adjektif

Jaku adjektif nya datai ari leka jaku ti nyadi leman teras dalam konstruk frasa adjektif. Frasa adjektif tau datai ari seleka jaku adjektif enggau leman penerang ti bukai baka jaku bantu tauka jaku penguat. Jaku adjektif nya mega ulih dikelala tauka dibida ari jaku nama tauka jaku pengawa, ari ti beratika chara iya ditempa. Suah bendar iya datai entudika jaku penguat.Jaku adjektif tau dibagi gagai semilan iti.

1.    jaku adjektif gaya              –          nelap, berani, takut, manchal, sakit, lubah, kiruh

2.    jaku adjektif chura             –          gadung, mansau, biru, kalas, pirang, chelum

3.    jaku adjektif sukat             -           panjai, pandak, dalam, tinggi, mipis, tebal

4.    jaku adjektif tukuh             -           benjung, jungkang, jebung, lusing, ganggam

5.    jaku adjekif rawang

a)    rawang asai                 -           nyamai, manis, pait, masin, kelat, bias, pedar, tabar

b)    rawang peda               -           bajik, sigat, jai, jelan, memelan

c)    rawang dinga              -           ragak, chapuh, sunyi, gemetar, bedegum

d)    rawang bau                 -           angus, ngaba,  tengung, bai, sinang

e)    rawang tegu                -           kasar, lichen, alus, lembut, kering

6.    jaku adjektif maya             -           laun, jampat, tumu, lengkas, diatu, lagi

7.    jaku adjektif geragayak ati            -           lelengau, nyima, sinu, asa, rawan

8.    jaku adjektif seraka           -           jauh, semak, ngejang, bejarit, bejenguk, sepenikau

Raban Jaku Tugas   

Raban jaku tugas nya raban jaku ti betukuh mayuh bengkah tauka disebut heterogen, iya nya datai dalam raban ti bekeremit sereta bebida-bida tang taja pia iya bisi ngembuan tukuh ti sebaka. Iya enda ulih bediri nyadi leman teras ngagai frasa endosentrik iya nya frasa nama, frasa pengawa enggau frasa adjektif. Semua leka jaku dalam raban jaku tugas semina ulih masuk ke dalam pasuk ayat bepanggai ba kaul iya enggau jaku pengawa, jaku nama, enggau jaku adjektif lalu nambahka nya iya mega bepanggai ba kaul enggau chara terus enggau pasuk frasa tauka klausa. Peratika chara jaku penguat tau masuk ke dalam frasa adjektif ari kaul iya enggau jaku adjektif, baka ba chunto di baruh tu:

Frasa adjektif
Jaku penguat	Jaku adjektif
amat chukup sigi kurang pemadu	bajik peninggi manah masin besai
Jaku tugas masuk ke dalam ayat, klausa, tauka frasa kena nanggam lalu ngenegapka sesebengkah tugas sintasis ti nyata, sekalika nyadi penyambung, penerang, penguat, enggau mayuh tugas bukai. Bepelasar ba tugas ti baka nya, dia jaku tugas tau dikelala ari rintai di baruh tu: 1.    jaku penyambung – tauka, enggau, lalu 2.    jaku tekenyit – apu, akai, bah 3.    jaku tanya – baka ni, kemaya, berapa 4.    jaku perintah – arap, minta, lalu 5.    jaku pun ayat – kebuah pia, taja pan, enggau tu 6.    jaku bantu – udah, deka, kala 7.    jaku penguat – amat, pemadu, chukup 8.    jaku penentu – mih, dih, pia 9.    jaku sangkal – ukai, enda, nadai 10.  jaku penunjuk – nyin, nya, tu 11.  jaku penempat – di, ke, ari, dalam 12.  jaku pemendar – ya, amat, au, bendar 13.  jaku penyampau – dia, semua, setengah 14.  jaku adap – atas, baruh, tisi