Definisyen fonetik enggau fonologi
Nitihka penemu Padang enggau Chemaline (2011), pansik munyi
jaku ti diasilka organ artikulasyen nya dikumbai fonetik. Retinya fonetik mansik
produksyen enggau persepsyen munyi jaku. Fonetik ulih dibagi ngagai tiga bansa,
iya nya fonetik artikulasyen, fonetik akustik enggau fonetik auditori. Nya alai,
fonetik begunaka pengawa mansik tiap-tiap leman munyi, lalu ngasilka transkripsyen
ungkup tiap-tiap munyi ari semua jaku. Fonologi iya nya siti pampang ti mansik sistem
sekeda munyi dalam sesebengkah jaku mensia. Pampang fonologi mega nyimpul,
betungkapka lalu ngemidaka tukuh munyi jaku sesebengkah jaku dikena nentuka atur
enggau tukuh sekeda munyi jaku nya. Nya alai fonologi nerangka pasal seraban munyi
ti diasilka mensia, betungkap lalu nyerita pasal sistem munyi semua jaku ti dipansutka,
sekalika disebut mensia enggau engkeman tauka enda.
Fonologi mega mansik munyi sesebengkah jaku mensia sereta
negika tukuh asal sistem munyi jaku nya. Pampang tu betungkapka kaul entara beberapa
leksikal ti nirika ayat. Fonologi megai siti agi tanggung pengawa iya nya mansik
pola entak sebut tauka intonasyen. Ari leksikal enggau pola entak sebut tu mih ke
ulih ngasilka sistem sepil sesebengkah bansa jaku.
Nitihka penemu Padang enggau Chemaline (2011) mega,
seduai iya bisi mantaika pansik siku ari tebangkar jaku iyanya Abdullah Hassan ti
bisi mega mantaika pansik iya pasal sistem tauka struktur jaku. Nitihka penemu tebangkar
jaku tu, kitai enda tau enda ngelala ni bagi fonem ti bisi dalam sesebengkah jaku
lalu bakani iya dikena dalam jaku nya. Fonem nya unit jaku ti digaga dikena ngemudahka
pengawa ngaga deskripsyen sistem munyi tauka fonologi. Mensia ulih ngasilka mayuh
bengkah munyi tauka fon tang semina beberapa bengkah fon aja ti distingtif tauka
nyelai. Fon tu mih ti ditusun sereta didijir nyadi leka jaku kitai mensia.
Dalam bup Abdullah Hassan (2006) iya nya Linguistik Am, iya mansik munyi jaku ti didinga
iya lalu munyi tu tadi dipechah-pechahka iya ngagai unit munyi ti mit agi, lalu
udahnya iya nyeritaka nama pangka tauka biuh reti ngagai orang ti mendingka jaku
nya. Iya mega nerangka ni bagi organ sebut ti ngasilka munyi jaku lalu nentuka sekalika
munyi ti pansut nya begetar tauka enda, sekalika peti sura nyawa nya tutup tauka
enda. Ari nya tadi, munyi ti pansut nya tau dikelas ngagai vokal tauka konsonan.
Munyi nya tadi mega tau ditranskripsyenka, retinya meri lambang tauka kelai. Kelai
nya mih ti disebut kitai lambang fonetik.
No comments:
Post a Comment