Jaku silup

Jaku silup

Jaku silup tau mega dikumbai jaku kelaung. Kebuah pia laban jaku silup tu bisi belalai tauka beentelah, enda baka jaku sema, ke alai utai ke endur nyemaka nya ulih dipeda, didinga tauka diasaika. Jaku kelaung mega dikena ngambika enda mantang lalu manah didinga. Jaku silup selalu enda berambai, enda betimbal, kadang-kadang seleka dua aja. Leka jaku nya selalu mudah ditemu reti enti kitai deka nyalinka iya seleka-seleka tauka sepemanjai luntang iya.

Ambika banding :ka ngabas rau (ba sungai nya). Enti nuan enda berundingka silup jaku ngabas rau, dia nuan tau ngumbai luntang jaku nya madahka orang ke bejaku nya deka mansang bejalai meda rau ba sebelah-belah sungai, ke ditunjukka iya nya ngagai nuan. Tang reti utai ku iya nya, madahka diri deka berikan ba sungai nya. Jaku silup ti baka tu dikena ba endur ke agi latung agi kudi awakka pejalai nya enda jelungan tauka regu. Chunto siti agi : lebuh kitai merau ba sungai besai, tauka batang ai, dia orang bejaku munyi tu: “Ngetu dulu kitai bekayuh, tak beranyut aja, nekuka lengan dulu. Nyau nadai agi puak engkubung tu.” Enti nuan enda kala ninga tauka enda nemu nekuka lengan enggau nadai agi puak engkubung nya jaku silup, dia nuan semina meretika reti leka jaku nya ke amat, iya nya nekuka lengan reti iya melekuka lengan sentang siku, enggau nadai agi puak engkubung nya mai reti kayu engkubung nyau abis puak. Tang reti (entelah) jaku kelaung nya “makai” enggau “lapar”. Kedua-dua jaku nya mali disebut ba endur ke mayuh baya enggaika orang ti bejaku nya pansut pemuni sereta dianu baya.

Jaku sema banding

Enti nitihka reti iya ba jaku Iban, ukai jaku sempama tulin, laban nya jaku semina dikena nyemaka gaya utai ti deka diterangka kitai ngagai peninga, ngambika sida iya jampat meretika kuing beriya ke dipadahka kitai ngagai sida iya. Leka jaku ti suah dikena ba pun rambai jaku sema nya baka : enda nyalah-nyalah baka, baka, itah enda baka, asai, munyi. Kedua, kebuah jaku sema tu ukai jaku sempama (ba Iban) laban iya selalu nyemetak nyebut gaya utai ke endur kitai nunjukka sema kitai enggau nadai belalai, nadai beentelah. Tang kebuah jaku sema tau dikumbai jaku dalam, laban dalam iya dikena nyema iya mega mai reti kediri ke dalam sereta menyana.

Ambika chunto iya ke bepun enggau baka:baka mayau enggau uduk. Reti nya sebaka enggau mayau enggau uduk ti enggai bepeda pangan diri. Reti jaku sema tu ke bendar, nya madahka orang ti ka endar belaya. Jaku sema ti bepun enggau asai:asaika ngenggam telu. Jaku sema tu pan udah chukup terang reti. Reti nya madahka pengerawan ati lebuh ngenggam telu takut enggaika telu nya pechah. Reti jaku sema tu ke bendar iya nya, rawan ati tauka kelalu takut ditinggang penusah ti mudah datai (kelebih agi pengirau ati apai indai ngembuan anak dara). Chunto leka jaku sema ke bepun enggau munyi:munyi burung makai buah kara. Jaku tu pan nadai belalai. Reti nya nyemaka penginggar lebuh bebala mayuh.