Jaku simbol

Jaku simbol

a) Pesindang

Pesindang tu iya nya repik kayu ti diselitka ba bi tibak ba batang kayu tauka ba kayu ti dientakka ba tanah. (baka gaya urup x) Tu nitihka Bup Sereba Reti Jaku Iban ti ditusun ulih Janang Ensiring, Jantan Umbat, enggau Robert Menua Salleh). Pesindang mega kelibak tauka sempiar kayu ti ditibak sereta diselitka ba batang kayu bukai. Iya mega suah agi diselitka melintang ba pun kayu. Nambahka nya, pesindang dikena nandaka pengelimpang jalai peti tauka panjuk tauka endur ti mali dipasuk tauka ditengah. Ambika chunto baka umai ti baru udah dipemali. Pesindang diengkah ba tisi umai. Nya nandaka enda tau tama ngagai umai nya. Pengelama pemali umai nya iya nya 3 hari. Udahnya baru tau tama ngagai umai nya. Enti nyema bisi orang tama ngagai umai nya dalam kandang iya mali ditengah, orang nya deka ditunggu enggau mata duit (mungkul 4 tauka 4 ringgit), duku sebilah  tauka repik besi, manuk siku, enggau pinggai. Pesindang mega dikena nanda ambu pasal temuda. Ngambika chunto, pun buah enggau kayu deka ditebang ke ramu. 

b) Pelepa

Pelepa nya digaga ari daun kayu enti di tanah. Enti di dalam rumah, iya selalu agi digaga ari kain tauka pua kumbu. Pelepa mega dikena nagang orang nengah umai lalu digantung ba tisi umai. Ngambika chunto, lebuh Iban baru urah ngemali umai, dia umai mali ditengah orang bukai laban nangika sida nguluka antu chit enggau antu pipit ngachau padi. Pelepa dikena ngelai rumah nya mali ditiki temuai, lalu dia orang ngempang jalai pendai ngena pelepa.  Ngambika chunto enti Iban baru udah ngintu rumah ngena chara pelian tauka gawai. Pelepa nya mih nyadi tanda tauka kelai ti endang dikeingatka bansa Iban ari turun-menurun. Kelai tu endang agi meruan dikena Iban bepadah datai ke sehari tu.

c) Temuku tali

Sebedau bansa Iban bekenaka surat dulu kelia, bala tuai kitai sigi ngena temuku tali nesau bala rayat. Temuku tali iya nya tali ti disimpulka, sekalika digagaka temuku dikena ngitung hari dalam siti timpul pasal pengawa besai ti deka dikereja. Ngambika chunto baka Hari Gawai enggau pengerami melah pinang. Enti tuai kayau tauka tuai serang deka bekangauka mensia mayuh awakka sama nurun ngayau sereta sebala, iya ngirumka temuku tali ari rumah iya lalu dibai ari endur siti ngagai endur siti. Selambar bulu manuk enggau siti rangkang ke udah angus ditunu setengah sama ditanchang enggau temuku tali nya. Selambar bulu manuk nya bisi mai reti lalu semua utai ke ditanchang sama dia enda tau enda dipejalaika ari rumah siti ngagai rumah siti enggau naka penyampat enggau pengelengkas iya. Bulu manuk nya nyadika tanda tauka nyadi lambing iya mesti lempung sereta laju dipejalaika bala ti udah ditesau tuai nya tadi. Rangkang tauka kayu mit ti udah setengah angus ditunu nya ngayuka baka reti sempun ulih ambika tenggau lebuh bejalai malam. Semua perengka ke dikena bekangau minta tulung minta saup enggau minta sah nya enda tau enda mindah dipejalaika ari rumah siti ngagai rumah siti enda ngira ari siang malam tauka petang.

Pesan lebuh bebaika bala nurun ngayau nya mesti ditusi tauka dipadah ngena leka jaku. Semua utai nya mega ending enggau naka penyampat diasuh bejalai mindah ari siti rumah ngagai rumah siti ngichaka iya lengkas datai ba adan iya tauka orang ke dipadah sama enggau nurun ngayau nya tadi. Semua rengka enggau kelapung iya enda tau ngetu ngapa lebuh dipejalaika enti sida bedau datai nuntung ba rumah ke batang diambi sama dibai enggau ngayau enggau mulau dulu menya. Sapa-sapa ke diasuh tuai ngenataika utai nya tadi enda tau enda nusi ngagai orang ke dituju kangau tauka panggil nya. Siti temuku ba tali nya bisi mai reti berapa ari da timpuh utai ke dipesan nya tadi deka nyadi. Siti temuku nya mai reti sehari. Dalam sehari, siti sintal nya patut diketas. Penyampau hari ke tinggal nitihka pemayuh temuku tali ke bedau diketas. Ninting pagi udah kerebak tawas siti temuku nya enda tau enda dibuka simpul iya nyentukka abis. Enti sintal ke penudi bendar udah diketas, nya nandaka pengawa deka belabuh hari siti. Lebuh pengabis temuku tali nya dibuka, semua bala anak pungka laki enggau bala manuk sabung ke deka nurun ngayau enda tau enda udah sama datai begelumu ba rumah tuai kayau ke ngirumka panggil nya tadi.

d) Tambai

Tambai iya nya tanda rumah mali ditiki temuai kelebih agi lebuh rumah nya bisi ditinggang penti pemali. Tambai nya mega dikumbai menira sereta selalu digitang orang ba sekula enggau ba opis-opis perintah. Tambai tu digitang mega maya nyambut Hari Merdeka ba menua Malaysia.Dikena ngelala tambai nya, iya nya gerempung daun kayu idup digantung bap ala tangga setak-setak rumah. Tambai mega diengkah ba tisi tauka sukut umai dipelepa enggau daun rajang idup. Kain enggau chapak dituat enggau kayu ba pendai enggau jalai nuju ke rumah. Enti nyema penti pemali enggi orang ke sepintu aja, tambai nya digaga ari gerempung daun kayu idup tauka kain kanggan sunting kapu lalu digantung ba mua pintu bilik.

e) Ruding

Ruding iya nya tulang ti lembut ba idung babi lalu kerup-kerup lebuh dikunyah. Enti ba leka pantun, ruding nya mai reti kesuling. Kesuling iya nya perengka main ti digaga ari buluh tauka temaga lalu disepu lebuh bemainka leka pantun. Dulu kelia, ruding tu dikena berandau enggau pangan diri lalu semina orang ti nebah ruding tu aja ulih nemu nama utai ti dikejakuka. Beduduk ari nya, orang bujang dulu eklia ngena ruding tu lebuh sida ngayap. Sida ngena ruding nya dikena madahka penatai sida ngagai orang ti dara lalu nyadika kelai dikena nandaka enti sida udah datai ba bilik indu dara ti deka dikayap sida. Kelimpah ari bansa Iban empu, ruding tu suah agi dikena bansa Penan. Ba sida bansa Penan, ruding tu dikumbai sida “oreng”. “Oreng” selalu dimainka sida lebuh maya lepa.

Ruding suah dimainka bansa Penan ti indu dikena madahka pengaga ati enggau lebuh sida tusah ati mega. “Oreng” mega dimainka enti nyema bisi temuai datai. “Oreng” tu tusah dimainka enti nadai ngembuan pemandai lalu begunaka penemu bemain ngena dilah enggau mulut. Nitihka penemu orang Penan, “oreng” semina ulih dimainka indu aja lalu enti nya dimainka lelaki, nya tau ngasuh sida tesat lebuh dalam babas. Bansa Penan mega arapka “oreng” tu dimainka lebuh sida benung besulu.

f) Terantang begau

Terantang begau mega tau dikumbai terantang kumbai ( Bup Jaku Dalam, Janang Ensiring) . Terantang begau tu iya nya bepadah ngagai bala mayuh seraya bepangkungka tawak. Tawak dipangkung dikena ngemegau orang ngambika datai ngesah penusah, madahka bisi pemati tauka rabat lalu dikena madahka sesebengkah pekara ti nyadi. Tawak mega dipangkung enti rumah diserang munsuh tauka tasah angus. Sebedau kitai bansa Iban ke bekenaka jalai tulis tauka bepanggil ngena surat, tuai kitai raban bansa Iban baka Pengulu enggau Tuai Rumah ke dulu menya endang sigi ngemeranka ngena jalai asal kitai bansa kena bepanggil tauka bekangauka mensia mayuh enti bisi ditinggang penusah tauka minta tulung beguai ari bala mayuh. Sekalika iya nya maya ke bisi penusah angus rumah, bisi orang mati bebadi, kena pangka kilat, kena tambun tanah tusur, tabanka tanah runtuh, ampuh bah tauka kena serang kayau anak tauka minta sah laban kena alah laban bala munsuh enggau mayuh bengkah penusahka bukai ke bisi nuntung, orang tuai kelia endang bekangau tauka bepanggil ngena chara enggau jalai asal bansa kitai empu.

Jalai nya enda bula nyelai didinga ke kitai ke rebak baru kemaya ari diatu, tang iya cukup ngasi ba raban bansa kitai bansa Iban empu, laban nya mih chara enggau jalai ti endang dititih sereta dikemeranka aki ini kitai ari dulu kelia lalu nyentukka kemaya hari diatu, lalu adat nya sigi amat ngasi ba kitai bansa iban.

Lebuh tanda panggil nya datai ba sebuah-sebuah rumah bala manuk sabung enggau bala pungka laki, orang ke kena tuju tesau nya enda tau enda nyendiaka diri bengepan sereta siap enggau senjata perang sida, baka terabai, sangkuh, nyabur, gansai, sumpit, ipuh, pemalu beduri, pedang, ilang, sereta keresa bukai ke diguna lebuh maya besatup enggau bala munsuh lebuh rambau maya nya kelia. Enti orang nya sigi udah ditemu lama sakit, nyema orang bisi ninga terantang tawak panjai tiga kali bejurut, reti nya orang ke sakit nya udah ngapuska seput. Tawak nya diterantangka baru enti bangkai iya udah dipansutka ngagai sapat ba ruai. Lalu pia mega dalam adat pemati ke bisi dikena ba ai Krian enggau Saribas, setawak nya diterantang panjai tiga kali bejurut enti lebuh maya bangkai orang nya baru deka nurun dianjung ngagai pendam.

Atur terantang tawak munyi nya tadi agi dikena nyentukka seharitu di menua pegai Betong, Debak, Saratok enggau Roban, lalu bisi mega dikena ba sekeda kandang menua bukai baka ba menua Batang Rajang, Kemena, Batang Lupar enggau Baram enggau pati ai sida iya. Terantang begau tau mega kena ngemegau bala bukai minta sah enti diri serumah bisi penusah lenyau, lemas tauka lesap ba ai baka diterekam baya, enggau mayuh penusah ke bukai. Tawak nya enda tau diterantangka ngapa enti nadai kebuah. Pangkung tauka terantang begau nya mayuh bengkah munyi, laban sesebengkah nya ngayuka sada ke enda sebaka reti. Reti nya, tiap-tiap iti pangkung tawak nya ngembuan reti sereta munyi ti bebida. Ngambika banding, enti terantang nya panjai lalu enda ngetu, reti iya nya madahka bisi penusah besai minta bantu tauka minta sah tekala nya sereta chukup beguai. Nya alai, terantang begau tauka terantang kumbai tu suah agi diguna lebuh bisi penusah ba kandang siti-siti menua dikena ngangau orang ti semak nulung sida enggau naka pengelengkas.